I ati i shkruan Bjordit

Big Brother i ka rezervuar Bjordit një surprizë jo të zakontë: një letër nga i ati. Ajo u lexua për publikun gjatë spektaklit, nga Arbana, por edhe Bjordi do të ketë mundësi, pas aprovimit të së ëmës, ta lexojë atë. I ati e ka braktisur Bjordin kur ky ishte fare i vogël dhe që atëherë Bjordi nuk ka patur asnjë kontakt me të. Në letër ai i shpjegonte të birit arsyet që e kishin çuar në një veprim të tillë. Ai kishte qenë i alkoolizuar dhe kjo kishte qenë vetëm një nga pasojat, por sigurisht më e rënda. Por ai tashmë kishte ndryshuar, kishte hequr dorë nga pija prej vitesh dhe kishte kuptuar shumë nga gabimet e tij. Ai i shkruante gjithashtu se e kishte ndjekur këto kohë në Big Brother dhe se Bjordi i ishte dukur një djalë i mrekullueshëm, meritë e padiskutueshme kjo edhe e Antonetës, të ëmës së tij. “Me fatin nuk bëhen biseda paraprake, - përfundonte i ati i Bjordit letrën e tij, duke cituar Hygonë, - është mbreti fat ai që na bën ose fatlum ose fatkeq!”